फौज:-
****
ढगांची नभी वाढती फौज आहे
इथे आठवांची मनी फौज आहे
मला एकटयानेच जिंकून गेला
वृथा आणली केवढी फौज आहे
नवी शांतिदूतासवे लष्करेही
अहिंसा, म्हणे कालची फौज आहे !
मनासारखे लाभले दान थोडे
उभी मागण्यांची नवी फौज आहे
तसा शूर आहे तिचा हा अबोला
सवे आसवांची छुपी फौज आहे !
**********************
मौज :-
*****
बहाण्या-उखाण्यांतली मौज आहे
तिला भेटणे वेगळी मौज आहे !
करा वादळाचीच निंदा कशाला
किनारी तरी ह्या कुठे मौज आहे ?
तुझा संग नाही नशीबी- नसू दे
तुझ्या फक्त ध्यासातही मौज आहे !
कुणा आवडे स्पष्ट बोलून घेणे
कुणा वाटते मौनही मौज आहे..
जरा आपले दु:ख वाटून घेऊ…
असे वाटणेही किती मौज आहे !
उन्हाच्या कपाळी सदाचा उन्हाळा
उन्हाळी सुटीची कधी मौज आहे ?
************************
आणि एक स्फुट द्विपदी…
तुला भेटणे वेगळी मौज आहे
मला रोखण्या केवढी फौज आहे !
वाचून बघा 
प्रतिक्रिया व्यक्त करा